Categories
Kanun Labarai

Yunƙurin mayar da Yusuf Buhari zuwa sashin masu fama da matsalar ƙwaƙwalwa a babban asibitin ƙasa dake Abuja yaci tura

Dukkan yunƙurin da aka yi domin mayar da Yusuf Buhari zuwa sashin masu fama da matsalar ƙwaƙwalwa na babban asibitin ƙasa dake birnin tarayya Abuja yaci tura daga asibitin Cedarcrest. Duk kuwa da cewar daman can mutane sun sha fadin cewar, iyalan Shugaban kasa basu gamsu da asibitocin Najeriya ba.

A ranar Laraba, jaridar DAILY NIGERIAN ta fara bayyana halin da Yusuf Buhari yake ciki sakamakon mummunan hadarin babur din da yayi, wanda Yusuf Buhari tare da abokin tserensa Bashir Gwandu suka yi taho mu gama abinda ya jefa su cikin wani mummunan hali.

A daidai lokacin da aka fara tunanin mayar da Yusuf Buhari zuwa babban asibitin kasa dake Abuja domin cigaba da jinyarsa acan, Gwamnatin tarayya ta sa aka fara yiwa sashin masu fama da matsalar kwakwalwa dake asibitin kwaskwarima domin samarwa dan shugaban kasar yanayi mai kyau.

“Ko ina a sashin da ake zaton za’a kai Yusuf Buhari anyi masa kwaskwarima, anyi fenti a ko ina, amma duk da haka sai aka zabi a bar Yusuf Buhari ya cigaba da jinya a sashin masu mummunar karaya, maimakon sashin masu fama da matsalar kwakwalwa inda wannan ita ce matsalar da Yusuf Buhari yake fama da ita a yanzu” A cewar wani makusanci ga iyalan Shugaban kasa.

Haka kuma, inda ake sa ran za’a kai Yusuf Buhari a babban asibitin kasa dake Abuja, sai da Ministan lafiya na tarayya ya kai ziyara asibitin domin duba sashin da za’a kwantar da dan gidan Shugaban kasar.

Wadan da suka ce da zarar Yusuf Buhari ya farfado a dauke shi zuwa kasar waje sune suka janyo aka fasa mayar da shi babban asibitin kasa dake Abuja. Ana sa ran daga zarar halin da Yusuf Buhari ya kyautata za’a fitar da shi zuwa kasar waje domin yin jinyarsa a can.

Wasu bayanai sun tabbatar da cewar, Shugaban kasa Muhammadu Buhari, ya kalubalanci jami’an tsaro akan dan me zasu kyale dansa Yusuf ya tuka wannan babur mai tsananin gudu.

 

Categories
Labarai

Gwamnati ta haramta babur din nan mai tsananin gudu a birnin tarayya Abuja

A ranar 28 ga watan Yunin 2014, Ministan babban birnin tarayya Abuja, Sanata Bala Muhammad, ya umarci Kwamishinan ‘yan sanda na birnin tarayya, da ya kama tare da gurfanar da duk wanda aka kama yana tuka babur din nan mai tsananin gudu a tsakiyar birnin tarayya Abuja.

Wannan umarni ya biyo bayan, wani bayani da jami’an tsaro suka bayar na cewar, wadan da suka kai hari a EMAB Plaza dake unguwar Wuse II a babban birnin tarayya Abuja, sun yi amfani da irin babur dinanna mai tsananin gudu.

Tun da jimawa daman aka haramta amfani da Baburan hawa a birnin Abuja, amma kuma masu amfani da babur din nan mai tsananin gudu kirar zamani, suna cin karensu da babbaka, domin suna yin guje guje ba tare da doka ta yi aiki a kansu ba.

Wannan umarni, an baiwa kwamashinan ‘yan sanda na lokacin a wasikar da Ministan ya aike masa a ranar 27 ga watan Yunin 2014, kuma Sakataren din-din-din John Chukwu ya sanyawa hannu, yana mai cewar, dokar hana amfani da babura a cikin birnin Abuja tana nan a lokacin.

A sabida haka, wannan doka har yanzu tana nan kamar yadda wani jami’i a FCTA ya tabbatarwa da DAILY NIGERIAN, kuma har yanzu Ministan Abuja Muhammad Musa Bello ba ce an canza dokar ba.

Categories
Kanun Labarai

Fadar Shugaban ƙasa ta yi ƙarin bayanin yadda akai Matattu suka shigo cikin jerin waɗan da aka baiwa sabbin muƙamai

A lokacin da take mayar da martini kan irin yadda aka dinga sukar sabbin naɗe naɗen da akai na Shugabannin Hukumomin gwamnati, inda aka samu matattu cikin jerin sunayan mutum 1,468 da aka baiwa muƙamai, fadar Shugaban ƙasar tace babu wani abin zargi kan jerin sunayan, domin sunayan ba tun yanzu aka tsara su ba.

Fitattun waɗan da aka kalubalanci nadin nasu, sun hada da Sanata Francis Okpozo, wanda ya mutu a shekarar 2016, kuma aka bayar har da sunansa a jerin sabbin sunayan da aka fitar ranar Juma’a a matsayin Shugaban hukumar Nigerian Press Council.

Mista Okpozo tsohon mataimakin kakakin majalisar dokokin rusasshiyar jihar Bendel ne, ya mutu a birnin Benin bayan wata gajeruwar rashin lafiya, haka kuma, an taba zabensa a matsayin Sanata a karkashin rusasshiyar jam’iyyar SDP.

Bayan haka kuma, mai Magana da yawun fadar Shugaban kasa, Malam Garba Shehu yayi bayanin cewar, wadannan jerin sunaye an tsara su ne tun lokacin tsohon Sakataren Gwamnatin tarayya wanda aka sallama daga aiki bayan da aka zarge shi da yin sama da fadi, Babchir David Lawal.

Ya kara da cewar, abinda ya faru shi ne, an umarci sabon sakataren gwamnati da ya cigaba daga inda BD Lawal ya tsaya kan tsara sunayen mutanan da za’a baiwa mukaman, ya kuma fitar da sunayen ba tare da ya bisu daki daki ba kamar yadda aka bashi umarni.

A lokacin da yake tattaunawa ta wayar tarho da wakilin jaridar PREMIUM TIMES, mai Magana da yawun fadar Shugaban kasa, Garba Shehu ya cigaba da cewa, “A shekarar 2015 Shugaban kasa ya umarci dukkan Shugabannin jam’iyyar APC da su mika masa sunnayen mutane 50 da za’a nada su a wadannan mukamai”

“A sabida haka, an gama tattara wadannan sunayan ne a babbar sakatariyar jam’iyyar APC ta kasa, daga nan aka mika sunayen zuwa ga ofishin sakataren Gwamnatin tarayya na lokacin Babachir David Lawal”

“Haka kuma, an samu korafi daga wasu Gwamnonin jam’iyyar APC, wanda suke jin anyi musu ba daidai ba wajen tsallake su a nemi jam’iyya da ta bayar da sunayen, a sabida haka domin baiwa Gwamnonin dama suma, Shugaban kasa ya kafa kwamiti karkashin mataimakinsa, domin ya duba korafin Gwamnonin kuma yaga abinda za’a iya yi akai”

Malam Garba Shehu ya kara da cewar, an jinkirta aikin kwamatin mataimakin Shugaban kasa Yemi Osinbajo ne, sabida a daidai lokacin Shugaban kasa ya kamu da rashin lafiya.

“Tafiyar Shugaban kasa jinya, ya sa aka samu tsaiko kan batun tantance sunayen wadan da ya kamata a baiwa mukaman, ba kuma yin maganar jerin sunayen ba, har sai da Shugaban kasa ya bukaci da a kuma kawo masa sunayen a yanzu”

Malam Garba Shehu bayyana cewar lallai an tafka abin kunya a wannan jerin sunaye, sai dai yace, babu wani dan Adam ajizi ne, babu wanda ya gagari yayi kuskure.

A sabida haka, wannan kuskuren da aka samu a wadannan jerin sunayen ba zai taba zama abin zargin na cewa an shirya rashin gaskiya kan lamarin ba. Haka kuma, yace dukkan kurakuran da aka yi a jerin sunayen za;a gyara su.

 

 

Categories
Labarai

Har da matacce a cikin jerin sunayan mutanan da Buhari ya baiwa mukamai

Tsohon wakili a cikin kwamitin amintattun jam’iyyar APC, Sanata Francis Okpozo, na daya daga cikin jerin sunayan mutanan da Shugaba Buhari ya baiwa mukamai na shugabannin ma’aikatun Gwamnati a ranar juma’ar da ta gabata.

Mista Okpozo, tsohon Sanata, wanda ya mutu a ranar 26 ga watan Disambar 2016, abin mamaki, yana daya daga cikin mutanan da aka baiwa mukamin Shugaban Nigerian Press Council.

Sakataren Gwamnatin tarayya  Boss Gida Mustapha ne dai ya bayyana sunayan mutanan da aka baiwa sabbin mukaman, kuma shi ne ya sanar da sunan Okpozo a matsayin daya daga cikin sabbin shugabannin, shekara daya bayan mutuwarsa.

Haka kuma, tsohon mataimakin kakakin majalisar dokokin rusasshuyar jihar Bendel wanda ya mutu a jihar Edo bayan yasha fama da jinya, an kuma zabe shi a matsayin sanata a jam’iyyar SDP.

Mista Okpozo, shi ne tsohon mataimakin kakakin majalisar dokokin jihar Bendel a karkashin rusasshiyar jam’iyyar UPN.

Ya mutu yana da shekaru 81 a wani asibiti mai zaman kansa a birnin Benin na jihar Edo, yayin daga bisani aka kaishi asibitin koyarwa na jami’ar Benin.

Bayan haka kuma, wata kafar sadarwa ta yanar gizo ta jiyo mai Magana da yawun Shugaban kasa, Femi Adeshina yana nuna juyayi da alhinin mutuwar Okpozo a madadin Shugaban kasa Muhammadu Buhari, inda yake cewa “Iyalai da ‘yan uwan marigayi Sanata Okpozo, wanda ya karar da rayuwarsu wajen yin kira ga adalci da daidaito musamman a yankin Neja Delta, a iyaka tsawon rayuwarsa ta hidima day a yiwa al’ummar yankinsa”

Bayanin ya cigaba da cewar, “Yana daya daga cikin jiga jigan jam’iyyar APC a yankin kudu maso kudu, Shugaba Buhari da kansa yace, Jam’iyyar APC ta amfana matuka daga cikin baiwar Okpozo”

 

Categories
Taska

Fina-finan Kannywood 12 da suka shahara a 2017

Daga Muhsin Ibrahim

Duk da babban kalubalen matsalar satar fasaha da masana’antar finafinan Kannywood ke fuskanta, amma an fitar da fina-finai da dama a cikin shekarar 2017, da suka kunshi masu kayatarwa da marar kyau da matsakaita.

Kuma kafin shekarar ta kawo karshe ana sa ran fitowar wasu sabbin fina-finai, kamar Juyin Sarauta, Sabon Dan Tijara, Dan Sarkin Agadaz, Mu Zuba Mu Gani, Dan Kuka a Birni da dai sauransu.

Don haka daya ko biyu daga cikinsu na iya shiga sahun Fina-finan 2017.

1. There’s a Way

Ana ganin wannan ne Fim na Inglishi na farko a masana’antar Kannywood, wanda furodusansa shi ne babban malamin Ingilishi Kabiru Jammaje, sannan Falalu Dorayi a matsayin darakta.

Fim din ya bayar da labari ne akan gwagwarmaya tsakanin masu karamin karfi da attajirai. Fina-finan Kannywood 12 da suka shahara a 2017

There is a wayHakkin mallakar hotoFALALU DORAYI INSTAGRAM

An fito da halayyar wasu ‘ya’yan attajirai a Jami’a da kuma rayuwar mata, wanda a haka aka tsara labarin.

Soyayya ce tsakanin Isham (Nuhu Abdullahi) Dan talaka amma hazikin dalibi da kuma Fadila (Hajara Jalingo) ‘yar wani babban hamshakin attajiri Alhaji Mahdi (Sani Mu’azu) wanda ba ya kaunar hada zuri’a da talaka inda ya bi duk hanyoyin da zai bi domin ganin ya raba su.

Ana sa ran This is the Way, zai fito kafin karshen shekara. Raunin Fim din shi ne karshensa da kuma amfani da salon harshe mai sarkakiya.

Amma tsarin fim din baki dayansa ya kayatar wanda hakan martani ne ga sukar da ake wa masu shirya finafinan Hausa cewa jahilai ne, da ba su iya da turanci ba.

2. Umar Sanda

Kamal S. Alkali ne Daraktan Fim din, labarin ya mayar da hankali ne a kan mai ra’ayin rikau Umar Sanda (Ali Nuhu) da iyalinsa.

Ko da yake ma’aikaci ne, kuma yana kokarin ganin iyalinsa na cikin wadata. Ana zaman lafiya har zuwa lokacin da ‘yarsa ta hadu da wani abokin karatunta Dan shugaban ‘Yan sanda da aka shagwaba, wanda kuma ta kashe shi a kokarin kare kanta.

Umar Sanda fostaHakkin mallakar hotoKAMAL ALKALI INSTAGRAM

Umar Sanda ne ya binne gawar a yayin da ‘yan sanda ke bincike mai tsauri.

Duk da cewa an kwaikwayi fim din ne daga wani fim na Indiya, amma yadda aka tsara shi zai iya kasancewa daya daga cikin mafi shahara a bana. Ya nuna girman gaskiya da hadin kai da dabi’u masu kyau.

3. Ankon Biki

Ali Gumzak ne daraktan Fim din, kuma Ankon Biki ya mayar da hankali ne a kan muhimmin batu da ake fuskanta a yanzu.

Mubarak (Adam Zango) da Fa’iza (Sadiya Bulala) suna shirin aure, sai Fa’iza ta kawo batun “Anko” da bukatar a hada wani babban bikin kasaita a wani wuri mai tsada.

Mubarak da abokansa sun yi iya kokarin ganin sun biya bukatar Amarya da kawayenta amma sun gagara, amma Amaryar ta dage a kan bukatar har ta bayar da kanta a madadin kudin kama wajen da za a yi bikin.

Ankon Biki fostaHakkin mallakar hotoMIA ENTERPRISES

Ya fasa aurenta a ranar bikin bayan asirinta ya tonu, kuma a madadinta ya auri kawarta ta kud da kud. Fim din ya nuna girman nisan da wasu mata ke dauka don cimma bukatunsu.

Duk da yake wasu wuraren a fitowar fim din na da tsayi amma an yi amfani da Hausa mai kyau da salon magana.

Sauran taurarin fim din sun hada da Hafsar Idris da Umma Shehu da Al Amin Buhari da dai sauransu.

4.Rariya

Yaseen Auwal ne Daraktan Rariya, kuma fim na farko da Rahama Sadau ta dauki nauyin fitowarsa, wato matsayin furodusa.

Labarin Fim din ya danganta tasirin wayar salula ta zamani da ake kira “komi da ruwanka”. Fim din ya shafi yadda wasu ‘yan matan Jami’a ke amfani da wayar salula domin janyo hankalin maza.

Yadda aka hada fim din ya kayatar. Babban muhimmin abu shi ne yadda daya daga cikin ‘yan matan ta banbanta da saura inda har ta yi kokarin kammala karatunta.

Fostar fim din RariyaHakkin mallakar hotoRAHAMA SADAU INSTAGRAM

Mutane da dama ba za su so haka ba, musamman iyaye da ke da’awar karatun ‘ya’ya mata. Amma duk da haka linzamin labarin ya shafi abin da ke faruwa kuma ke shafar jama’a.

Taurarin Fim din sun kunshi Ali Nuhu da Rabiu Rikadawa da Rahma Sadau da Fati Washa da Hafsar Idris da sauransu.

5.Mijin Yarinya

Ali Gumzak ne Darakta, kuma Mijin Yarinya ya shafi labarin wani Dattijo Attajiri Bashir Nayaya (Alhaji).

Wata rana ya ji matansa guda biyu da Allah bai ba su haihuwa ba suna ma shi addu’ar mutuwa domin gadon dukiyarsa kuma don su aure yara samari, su yi sabuwar rayuwa.

Saboda haka ne ya je ya auri budurwa Maryam Yahaya bayan ya saye imanin iyayenta da saurayinta da kudi.

Mijin YarinyaHakkin mallakar hotoFALALU DORAYI INSTAGRAM

Wannan ne ya fusata manyan ‘ya’yansa Aminu Sharif da Sadiya Bulala, inda suka taya iyayensu mata kishi.

Bayan shafe lokaci ana makirci da takaddama, Alhaji ya yanke shawarar sakin dukkanin matansa, hadi da amaryarsa. Fim din na kunshe da darussa masu yawa a yadda aka tsara fim din.

Sabuwar ‘yar fim Maryam Yahya ta yi kokari a fim din mai kunshe da gwanaye. Ba tare da zuzutawa ba fim din na cike da ban dariya da ilmantarwa.

6.Kalan Dangi

Wannan ma wani fim ne na barkwanci da Ali Gumzak ya bada umurni wato a matsayin Darakta, Fim din ya nuna yadda talakawa ke neman arziki da kuma attajirai.

Yayin da kuma masu arzikin ke kaskanta Talakawa. Ali Nuhu da Aminu Sharif da Sadiq Sani Sadiq da Jamila Nagudu da Fati Washa da Aisha Tsamiya na rayuwa ne ta nuna arziki da karya da makirci da nuna karfin iko. Idan kana neman nishadantarwa, to ka nemi Kalan Dangi.

Fostar fim din Kalan DangiHakkin mallakar hotoAISHA TSAMIYA INSTAGRAM

Sai dai an raba fim din biyu, na daya da na biyu. Amma an takaita labarin da kuma karshensa, wanda ake sa ran fitarwa a shekara mai zuwa.

Kamar taken fim din Karshen Kalan Dangi zai iya kawo karshen duk wani rikici.

7.Makaryaci

Kamar sauran shahararrun fina-finan barkwanci da aka fitar a 2017, Ali Gumzak ne daraktan Makaryaci.

Sadiq Sani Sadiq ne da Allah ya ba basirar wasan kwaikwayo, ya daukaka fim din a matsayin daya daga cikin fitattu a bana. Labarin Fim din ya shafi yadda kwadayinsa na dukiya ya kai shi ga samun kudi ba tare da ya sha wata wahala ba.

Yakan je ya yi hayar tufafi ya harde cikin babbar motar mai gidan Rabiu Daushe ana tuka shi zuwa wurare har zuwa cikin Jami’a. Yakan yi wa dalibai karyar cewa shi dan gidan minista ne ko ambasada.

Fostar fim din MakaryaciHakkin mallakar hotoSADIQ SANI INSTAGRAM

A hakan ne ya fara soyayya da daya daga cikin daliban Hafsat Idris. Ba tare da bin umurnin kakanninsa ba, ya je ya kadar da dabbobinsa na gado, domin ya kashe wa budurwarsa kudi wacce daga baya ta gano asalinsa.

Taurarin Fim din sun kunshi Sulaiman Bosho da Mama Tambaya da Mustapha Nabaruska da Musa Maisana’a da sauransu.

8.Husna ko Huzna

Husna (Jamila Naguda da Abdul (Adam Zango) sun shirya yin aure, yayin da kuma Huzna (Fati Washa) ta yi kokarin hana auren saboda matukar son da ta ke wa Abdul.

A yayin da suke hamayya, wata rana Husna ta watsa wa Huzna guba a fuska, ba tare da sanin cewa ashe fatalwa ce. Washegari Huzna ta tafi gidansu ta mallaki Husna.

Wannan ya bude wani sabon babin hamayya tsakaninsu inda Huzna ta shiga jikin Husna kuma ta ci gaba da zama a gidanta. Yadda aka tsara fim din ya ja hankali.

Fostar fim din Husna ko HuznaHakkin mallakar hotoFALALU DORAYI INSTAGRAM

Amma duk da akwai matsaloli da aka samu, Fim din na iya zama daya daga cikin manyan fitattu finafinai a Kannywood.

Fim din dai bai kasance wani abin muni ga mata ba, kamar yadda aka tsara labarin fim din irin na ban tsoro, a rikicin rayuwar aure tsakanin mata don mallakar namiji.

Rawar da Washa ta taka ya kayatar. Falalu Dorayi ne Daraktan Fim din.

9.Burin Fatima

Wasu za su yi mamakin yadda wannan fim ya shigo sahun fitattu. Ya cancanta. Labari ne akan wata matar aure da ta fada tarkon shawarar kawarta.

Aisha Tsamiya tauraruwar fim din ita ce kuma ta dauki nauyin fitowarsa a matsayin furodusa.

Fim din ya ba da labarin wata mata (Tsamiya) da mijinta, Adam Zango a yayin da ta ke makaranta, wata kawarta ta ba ta shawarar ta zubar da juna biyu da take dauke shi don ta samu sukunin karatu.

Fostar fim din Burin FatimaHakkin mallakar hotoALI GUMZAK INSTAGRAM

Ta karbi shawarar kuma ta yi wa mijinta karya cewa cikin ya bare, ba tare da sanin cewa ba ta kara haihuwa ba. Ta fuskanci kalubale daga sarakuwarta kan rashin haihuwa inda ta tursasawa Zango ya kara aure.

Ali Gumzak ne ya bayar umurni a fim din da ba a kashewa kudi ba. Sannan bai samu karbuwa ba.

Amma ba don haka ba da zai kasance daya daga cikin finafinan da suka samu karbuwa ga jama’a. Wannan dai ci gaba ne ga Tsamiya, kasancewar fim dinta na farko a matsayin furodusa.

10.Mansoor

Fim din Mansoor na FKD yana cikin wadanda ake kururutawa a matsayin gwarzon shekara. Ali Nuhu ne Darakta.

An fara fim din ne da soyayyar wasu matasa daliban makaranta, Maryam Yahaya da Umar M. Sharif.

Amma mahaifin Sharif ne ya kawo karshen abotar, saboda yana zargin Sharif ba ya da uba, wanda wannan ya ba shi kwarin guiwar gudanar da bincike domin gano asalin mahaifinsa, ba tare da sanin cewa ashe gwamnan jiha ba ne mahaifinsa.

Fostar fim din MansoorHakkin mallakar hotoMARYAM YAHAYA INSTAGRAM

Labari ne ya mamaye fim din. Kuma ko shakka babu, fim din ya kasance kamar a zahiri. Baki dayan fim din ya shafi labarin matasan masoya tsakaninsu da iyayensu.

An aiwatar da fim din da kyau. Taurarin fim din sun hada da Ali Nuhu da Abba El Mustapha da Baballe Hayatu da Teema Yola da dai sauransu.

11Dawo Dawo

Fim din Kabuwagawa ne wanda Ali Gumzak ya bayar da umurni.

Dawo-Dawo labari ne game da wasu da suka reni yaro (Adam Zango) tun kuriciya har girmansa inda suka kuma aurar ma shi da ‘yarsu (Maryam Gidado).

Amma daren farkon aurensu, amaryar ta yi karyar cewa tana da aljannu, ta tursasa ma shi ya sake ta. Nan take iyayen suka daura ma shi aure da kanwarta (Aisha Tsamiya).

Fostar fim din Dawo-dawoHakkin mallakar hotoALI GUMZAK INSTAGRAM

Ita kuma (Gidado) ta koma ga tsohon saurayinta (Zahraddeen Sani) wanda saboda shi ta kulla makircin. Daga baya ya yi watsi da ita, inda ta shiga wani hali ta koma kamar mahaukaciya lokacin da ta fahimci cewa ta dauke da cikin Zaharaddeen.

Fim din na cike da makirci da rikici, kuma taurarin fim din Zango da Tsamiya da Gidado suna yi kokari sosai. Wannan ya sa fim din ya sha gaban takwarorinsa a bana.

12Ta Faru ta Kare

Aminu Saira ne daraktan Ta Faru ta Kare, labarin fim din ya shafi rayuwar Hafsat Idris, gurguwa, makauniya amma ‘yar attajiri, da kuma Aminu Sharif (Momo) wanda ya aure ta kuma yake cin amanarta yana kawo ‘yan matansa a gidanta har zuwa lokacin da dubunsa ta cika.

Inda Adam Zango, abokin wasanta wanda Momo ya yi wa kanwarsa ciki ya yake shi har ya fitar da shi daga gidan.

Fim din Ta Faru ta KareHakkin mallakar hotoUMAR GOMBE INSTAGRAM

Fim din na tattare da nishadi. Hafsat Idris da ta fito mai nakasar jiki da kuma Momo sun yi kokari a rawar da suka taka a fim din.

Sauran taurarin fim din sun hada Hadiza Gabon da Hauwa Waraka da sauransu.

Categories
Labarai

A saki Sambo Dasuƙi ba tare da wani ɓata lokaci ba, inji iyalan Sultan Dasuƙi

Kungiyar Iyalan Sultan Dasuki da aka fi sani da ‘Sultan Ibrahim Dasuki Progressive Asspciation’, SIDPA, ta yi kira ga Shugaban kasa Muhammadu Buhari da ya girmama umarnin kotu akan batun dan su Sambo Dasuki.

Kungiyar ta ce, a saki Sambo Dasuki, wanda tsohon mai baiwa tsohon Shugaban kasa Goodluck Jonathan shawara ta fuskar tsaro, daga inda ake tsare da shi ya dawo gida cikin iyalansa.

A wata sanarwa da kungiyar SIDPA ta rabawa manema labarai, wadda sakataren kungiyar Kabir T. Auwal ya sanyawa hannu, sanarwar ta bukaci Shugaban Kasa Muhammadu Buhari, da ya girmama umarnin kotu da dokokin kasa, ya saki dan uwan su, sanarwar ta cigaba da cewa,iyalan sun yi shiru ne akan Sambo Dasuki, sabida suna zaton a gwamnatin demokaradiyya za’a bi ka’ida da kuma girmama umarnin kotu.

“Amma abin mamaki, yau kusan fiye da shekara biyu, Sambo Dasuki yana tsare bisa zalinci ba tare da wata kotu ta bayar da umarnin a tsare shi ba”

“Sana yiwa Sambo sharia’ah ne kawai a kafafen yada labarai, an tabbatar masa da laifi an ci zarafinsa duk a kafafen yada labarai, babu wata kotu da ta tabbatar masa da cewar shi mai laifi ne, sai dai kawai farfaganda da ake yadawa akansa, wannan Gwamnatin kuma tana gani ana yada abubuwan da ba gaskiya ba akansa amma suka kawar da kai” A cewar kungiyar SIDPA.

Kungiyar ta ce, ana tsare da shi tun kusan fiye da Shekaru biyu bisa zalinci da karya dokokin kasa, an sake shi, bayan kotu ta bayar da umarnin yin hakan, aka kuma kama shi bisa zalinci, an sake kama shi a Disambar 2015 bayan da ya cika dukkan sharudan bayar da belin da aka gindaya masa, amma Gwamnatin tarayya tayi burus da shi.

Kungiyar ta kuma kara da cewar, tun da aka tsare Sambo Dasuki, aka gabatar da shi gaban kotun tarayya, kotun kuma ta bayar da belinsa, haka nan, kotun ECOWAS, itama ba wai kawai cewa ta yi a sake shi ba, ta yi umarnin a biyashi diyyar Naira miliyan 15 na tsare shi da akai ba bisa ka’ida ba.

“Wakilan Gwamnatin tarayya, musamman hukumar tsaro ta farin kaya DSS, da kuma hukumar yaki da yiwa tattalin arzikin kasa zagon kasa ta EFCC dukkansu sun bijirewa umarnin kotuna akansa”

“Dukkanmu shaidu ne akan haka, wasu ma wanda suka aikata manyan laifuka kuma aka same su da laifi, duk an bayar da belinsu, bayan da ‘yan uwansu suka koka kan halin da suke ciki,amma shi kotu da kanta ta bayar da umarnin a sake shi amma anki bin umarnin kotu”

“A wannan al’amari na Sambo Dasuki, duk abinda ake cajinsa da shi ba wani laifi bane da za’a kasa bayar da belinsa ba, amma da gangan aka tauye masa hakkinsa, aka hana shi shaker iskar ‘yanci”.

“Kin amincewa ko bijirewa umarnin kotu da hukumomin tsaro suka yi akan batun Sambo Dasuki, wannan ba zai taba rasa nasaba da umarnin da suke samu daga Gwamnatin Buhari ba, wadda ta gaza matukar gazawa wajen yin adalci”

“Bangaren Shari’ah na Najeriya, yana bukatar sakar masa mara domin ya samu cin gashin kansa, ba tare da wani katsalandan daga bangaren zartarwa ba” A cewar kungiyar.

Haka kuma, kungiyar ta jaddada kira ga Gwamnatin tarayya da lallai ta bayar da Sambo Dasuki a matsayin beli kamar yadda tun farko kotuna suka bayar da umarni, sannan kuma, a cigaba da yi masa shari’ah a bayyana, ba yi masa shari’ah a cikin sirri ba, wadda kafafen yada labarai ke sharara karairayi akan ta.

“Tunda yanzu Najeriya ba kan tsarin mulkin kama-karya na soja take ba, to kuwa bai kamata a dinga karya kundin tsarin mulkin Najeriya ba, yana dacewa da bukatun wasu ba, dole a baiwa dan kasa ‘yancinsa kamar yadda kundin tsarin mulki ya bashi, indai ba kama-karya ake yi ba”

“A sabi da haka, muna kira da babbar murya ga Gwamnatin tarayya da ta girmamam tsarin Shari’ah, ta sakarwa Sambo Dasuki mara ya shaki iskar ‘yancinsa, indai bad a gangan Gwamnati tayi hakan ba, domin son ci masa mutunci da kuma cin zarafinsa”.

 

Categories
Kanun Labarai

Shugaba Buhari ya naɗa mutum 209 a matsayin Shugabannin hukumomi da mutum 1,258 a matsayin mambobi

A ranar Juma’a Shugaban kasa Muhammadu Buhari ya nada Shugabanni da mambobin hukumomin Gwamnati da aka jima ana tsumayin fitar sunayen.

Wata sanarwa da ta fito daga ofishin Sakataren Gwamnatin tarayya, tana cewar, Shugaba Buhari ya amince da nadin mutum 209 a matsayin Shugabannin hukumomin Gwamnati daban daban, da kuma mambobi guda 1,258.

A shiga wannan rariyar likau domin ganin cikakkun sunayen

Categories
Cinikayya Labarai

NNPC na bin ‘yan kasuwa masu dillancin Mai bashin Naira biliyan 800

Kamfanin main a kasa NNPC ya bayyana cewar yana bin manyan dillalan man fetur da kungiyar masu safarar man fetur din ta DAPPMA bashin Naira biliyan 800.

Babban sakataren kamfanin na NNPC, Olufemi Adewole ne ya bayyana hakan a wata sanarwa day a fitar a ranar Alhamis, yace amma dole dillalan manfetur din su tabbatar da yunkurinsu na wadata al’ummar kasarnan da man fetur.

Mista Adewole ya kara da cewar, bayan Naira biliyan 600 da NNPC take bin ‘yan kungiyar DAPPMA, sannan kuma, tana bin wasu Karin dillalan man fetur din bashin Naira biliyan 200, wanda a jumlace NNPC na bin su bashin Naira biliyan 800.

“’Yan kasuwa masu dillancin man fetur, sun taimaka wajen wadata al’ummar Najeriya da albarkatun man fetur, duk da bashin da ake binsu na Naira biliyan 600, bayan gashi ana bin sauran ‘yan kasuwarsu wasu Karin kudade day a kai jimillar kudin suka kai biliyan 800” Inji Mista Adewole.

Duk da cewar ‘yan kasuwar basu iya biyan bashin wadancan makudan kudaden da ake binsu bashi ba, amma ‘yan kungiyar dillalan manfetur din suna yin iyakar kokarinsu wajen wadata al’ummar Najeriya da albarkatun man fetur.

Ya kara da cewar, sun fitar da wannan sanarwar ne domin bayyana irin yadda wasu daga cikin ‘yan kasuwar da suke dillancin man fetur din ke yin kokarin wadata al’ummar Najeriya da man fetur, duk da ana cewar sun yi shiru sun kauda kai akan abinda dillalan man fetur din suke yi, musamman a wannan lokacin da aka samu karancin mai a ko ina a fadin Najeriya, wanda NNPC kokaringanin an shawo kan matsalar.

“Wannan sanarwar ba wata tadiya bace ga kokarin ‘yan kasuwar man fetur ko kuma kungiyar wanda sune manyan mataimak ga kamfanin main a kasa domin sadarda albarkatun mai ga sauran al’ummar Najeriya”

“Matsayar NNPC da kuma kokarinta na bayyana irin kokarin da dillalan man fetur suke yi a fadin Najeriya da kuma basu kariya, ba wani abin aibu bane kamar yadda ake ta zargin ana karkata akalar man zuwa ga bukatun wasu daban”.

Kamfanin dillancin labarai na Najeriya NAN a ranar 26 ga watan Disamba, ya yi rahoto kan zargin da kungiyar DAPPMA ta yiwa NNPC na kin wadatar das u da man fetur akan lokaci, wanda hakan ya janyo tsaikon da ake samu a wasu tashoshin samar da man fetur din.

 

Categories
Siyasa

Tsohon Gwamnan jihar Kebbi Saidu Dakin-Gari ya koma APC daga PDP

 

 

Tsohon Gwamnan jihar Kebbi, Alhaji Saidu Usman Nasamu Dakingari da yayi Gwamnan jihar Kebbi shekara 8 karkashin jam’iyyar PDP da mataimakinsa, Aliyu Ibrahim a ranar Juma’a suka bayyana komawarsu jam’iyyar APC daga PDP.

Kamfanin dillancin labarai na Najeriya NAN, ya ruwaito cewar, akwai da dama daga cikin jigajigan jam’iyyar PDP a jihar Kebbi da suka tsallaka zuwa jam’iyyar APC, da suka kunshi tsohon Sakataren Gwamnati, Rabiu Kamba, tsaffin ‘yan majalisar wakilai ta kasa Sani Kalgo, Abdullahi Dan-Alkali, Haruna Hassan da kuma Halima Tukur.

A lokacin da yake zantawa da manema labarai a Birnin Kebbi a ranar Juma’a, Gwamnan jihar Kebbi mai ci, Atiku Abubakar Bagudu ya bayyana wannan komawa APC da tsohon Gwamnan yayi a matsayin wani cigaba na musamman a jihar.

“Muna cikin farin ciki da kuma maraba lale da tsohon Gwamna a APC, kuma hakan ya kara nuna ana cewar Jihar Kebbi ta hade waje guda”

“Dalilin wannan hadu tamu, bai wuce mu ciyar da jihar mu da kasamar Najeriya gaba ba, ba mu da wani fata, face na cigaban jiharmu da kuma kasarmu baki dayanmu”

Shima a lokacin da yake tofa albarkacin bakinsa, Antoni janar na kasa kuma ministan Shariah, Abubakar Maalami, yace komawar tsohon Gwamnan Kebbi APC abu ne da aka nuna hikima a ciki.

“Muna fatan duk wani mahaluki a jihar Kebbi a ko ina yake, day a fito ya taimaki wannan hazikin Gwamna namu Abubakar Bagudu domin ciyar da wannan jihar tamu gaba”

“Gwamnatin tarayyar Najeriya tana yin iyakar kokarinta, wajen habaka tare da bunkasa tattalin arzikin Najeriya, kuma Gwamnatin Shugaba Muhammadu Buhari na yin kokari matuka akan sha’anin tsaro, gigginan manya da kananan hanyoyi a ko ina, da kuma batun inganta samar da wutar lantarki”.

Ministan ya bukaci sabbin ‘yan jam’iyyar APC din das u yi amfani da kwarewarsu wajen taimakawa Gwamnan mai ci, wajen bunkasar jihar Kebbi, dama najeriya baki daya.

Da yake Magana a madadin wadan da suka koma APC, tsohon mataimakin Gwamnan jihar Kebbi Ibrahim Aliyu, yace sun dangwarar da jam’iyyarsu ta PDP suka dawo jam’iyyar APC bad an komai ba sai don su ciyar da jihar Kebbi gaba.

“Najeriya na bukatar zaman lafiya, mu kuma a jihar Kebbi muna bukatar cigaba da kuma bunkasar jiharmu, mun dawo jam’iyyar APC domin hada karfi da karfe wajen ciyar da jiharmu gaba, kuma babu abinda zai bayar da dammar hakan illa mu koma APC”.

 

NAN

 

 

Categories
Labarai

Hukumar Hisbah a jihar Sakkwato ta zargi iyaye kan sakacin fyaden da ake yiwa yaransu

Hukumar Hisbah ta jihar Sakkwato, ta nuna damuwarta akan sakacin iyaye wajen yawaitar fyaden kananan yara a jihar. A ranar Alhamis, hukumar ta bayyana cewar, ta samu rahotanni 59 na yaran da aka yiwa fyade a shekarar 2017, tace kuma a mafiya yawan lokuta akwai sakacin iyaye wajen yiwa yaran nasu fyade.

Shugaban hukumar, Adamu Kasarwa, shi ne ya bayyanawa kamfanin dillancinlabarai na Najeriya NAN, cewar a jihar Sakkwato, wasu iyayan da dama basu cika damuwa kan inda yaransu suke zuwa ba, ko kuma das u waye suke mu’amala, dan haka ake yawan samun laifin fyade ga kananan yara sabida sakacin iyayansu.

Ya kara da cewar, “Sabida sakaci, wasu iyayan suna barin yaransu mata kankana,suna mu’amala da samari masu yi musu hidima a gida, har abin ya wuce lissafi, ta yadda a karshe irin wadannan masu yin aikatau kan kare da yiwa yaran fyade”.

Malam Adamu ya kara da cewar, Duk da cewar yara 59 aka samu rahotannin yi musu fyade a wannan shekarar ta 2017, amma hakan ya nuna raguwar ayyukan fyade a wannan shekarar, domin a shekarar bara ta 2016, an samu rahotonannin fuade guda 159, abinda yake nuna an samu raguwa sosai.

Sannan kuma, ya zargi masu unguwanni da dagatai, da karbar toshiyar baki, domin danne maganar gyade da ake kawowa gabansu a kauyukansu.

Y ace “A wasu kauyukan, su masu unguwanni ko dagatai da kansu, suke neman a basu dan na goro domin su danne maganar, sannan sukan yiwa iyayan da aka yiwa ‘yarsu fyade barazana da kada su kuskura su sanar da jami’an tsaro idan an yiwa ‘yarsu fyade”

Shugaban hukumar ya cigaba da cewar, rahotannin fyade da aka samu a wannan shekarar an mika su zuwa ga hukumar kula da hakkin kananan yara ta kasa NAPTIP da hukumar ‘yan sanda domin duba yuwuwar abinda ya dace.