Fadar shugaban kasa ta kaddamar da sabon jirgin shugaban ƙasa kirar Airbus A330 da aka siya karkashin Bola Ahmed Tinubu.

Bayo Onanuga, mai ba shugaban kasa shawara na musamman kan yada labarai da dabarun mulki, wanda ya fitar da hotunan jirgin a jiya Litinin ya ce sabon jirgin ya maye gurbin tsohon kirar Boeing B737-700 (BBJ) wanda ya shekara 19 ana amfani da shi tun lokacin shugaban kasa Olusegun Obasanjo.

Ko da yake bai bayyana adadin kudin da aka siya ba, Onanuga ya ce an sayo sabon jirgin ne kasa da farashin kasuwa.

Ya ce hakan ya sanya Najeriya ta samu ragin makudan kudade da ake kashewa wajen gyaran jirgin da sayen mai, inda ake samun miliyoyin daloli a duk shekara.

“Shawarar maye gurbin jirgin B737-700 (BBJ) ta biyo bayan wani zaman binciken da majalisar dokokin Najeriya ta yi wanda ya nuna shakku kan ingancin jirgin da kuma ingancinsa, musamman bayan da ya samu matsala a lokacin wata tafiya zuwa Saudiyya,” in ji shi.

“Kwamitin tsaro da leken asiri na majalisar dattawan Najeriya ne ya ba da shawarar a maye gurbin jirgin da ya riga ya tsufa don rage yawan kashe kudi wajen kula da shi.”