Hukumar yaki da sha da fataucin miyagun kwayoyi ta kasa NDLEA, ta cafke Misis Pamela Odin, ‘yar shekaru 32, bisa yunkurin safarar allunan Rohypnol mai nauyin kilogiram 2.150 ta filin jirgin saman Nnamdi Azikiwe (NAIA) Abuja.

Daraktan yaɗa labarai da bayar da shawarwari na hukumar ta NDLEA Femi Babafemi ne ya bayyana hakan a wata sanarwa da ya fitar a jiya Lahadi a Abuja.

Babafemi ya ce an kama matar ne a ranar 23 ga watan Satumba, yayin da take yunkurin shiga jirgin saman kamfanin jirgin saman Turkiyya dauke da maganin a boye a cikin barkono da kuma cushe cikin kayan abinci.

Ya ce wacce ake zargin ‘yar asalin kauyen Afiesere ne a karamar hukumar Ughelli ta Arewa a Delta, ta yi ikirarin cewa tana gudanar da wani gidan cin abinci a birnin Istanbul na kasar Turkiyya.

Babafemi ya kara da cewa “Ta yi ikirarin cewa ta zo Nijeriya ne domin ganin ƴan uwanta da kuma siyan kayan abinci don kasuwancinta na gidan abinci.”