Mataimakin shugaban majalisar dattawa, Barau Jibrin, ya samar da hanyoyi da zai tattauna da Shoprite, daya daga cikin fitattun manyan kantunan Najeriya, don su fasa rufe reshensu daya tilo a jihar Kano.

A tuna cewa kamfanin ya sanar a makon da ya gabata cewa ya yanke shawarar barin, Kano, cibiyar kasuwanci a watan Janairu, saboda ” kalubalen tattalin arziki ”.

Sai dai a wata sanarwa da mai ba shi shawara na musamman kan harkokin yada labarai da bayanai, Ismail Mudashir ya fitar, ya ce Jibrin ya shirya ganawa da mahukuntan kamfanin a Abuja kan lamarin.

“Ofishin mataimakin shugaban majalisar dattawa ya tanadi hanyoyi don dakatar da ficewa daga Kano da Shoprite ke shirin yi.

“Mai girma mataimakin shugaban majalisar dattawa, Sanata Barau I Jibrin, CON, zai gana da mahukuntan kamfanin a wannan makon inda za a tattauna batun da fatan za a warware.

“ batun kasuwanci ne tsantsa, amma za mu ga abin da za mu iya yi don shawo kansu su janye shawarar da suka yanke su ci gaba da zama a Kano.

“Kamar yadda muka sani, akwai dimbin damammakin kasuwanci a Kano, cibiyar kasuwanci ta Arewacin Najeriya. A lokacin da muke zawarcin masu zuba jari, ba za mu nade hannayenmu mu kyale su su tafi ba,” inji shi.