Kwamishiniyar Ilimin Sakandire ta Jihar Plateau, Elizabeth Wapmuk ta bayyana cewa gwamnatin jihar ta karɓe lasisin dukkanin makarantun firamare da sakandare masu zaman kansu a jihar.

Wapmuk ta shaida wa Kamfanin Dillancin Labarai na Ƙasa a yau Juma’a, a Jos cewa, an ɗauki matakin ne bayan gano cewa kimanin makarantu masu zaman kansu 5,000 ne ke gudanar da ayyukansu ba bisa ka’ida ba.

Kwamishinan ta bayyana cewa kusan kashi 90 cikin 100 na makarantun ba sa bin ka’idojin gwamnati da ka’idojin ilimi.

A cewar ta, ma’aikatar ta yi niyyar sake sabunta lasisin aiki na duk wasu Makarantun ƙasa da firamare, firamare da sakandire a jihar.

“Mun gano cewa kashi 90 cikin 100 na makarantu masu zaman kansu a Filato ba sa bin ka’idoji da ka’idojin gwamnati.

“Kashi 85 cikin 100 na makarantu masu zaman kansu 495 da aka baiwa lasisi a baya sun kasa cika ƙa’idojin gwamnati,” inji ta.

Kwamishinan, ta bayyana cewa an gudanar da atisayen ne domin duba yadda haramtattun makarantu masu zaman kansu ke yaɗuwa a jihar.

Ta kara da cewa za ta kuma tallafa wa waɗanda ke aiki bisa tsarin doka, don samun ingantaccen ilimi ga kowa da kowa.